Sunday, 15 January 2012

ஐந்தரங்காடல்

 நெல்லைக் காந்திமதியம்மன்
                         
                            பல்லவி
ஆடினையே தாயே! காந்திமதி நீயே!
அஞ்சனமைவிழி அருளினைச் சொரிய


                       அனுபல்லவி
அனலாடி புனலாடி அரங்காடும்
கூத்தாடியைக் கூடி குவலயம் வாழ

                           சரணம்
பொன்னி புரண்டோடப் பொன்னம்பலம் தன்னில
           மன்னு சிவகாம வல்லியாய்
                     கிண் கிண் என கீத கிண்கிணி பாட
                               மகிழ்ந்தாடும் சபாபதியுடன்

                                                               - ஆடினையே தாயே!



குற்றால அருவி குதித்தோட சித்திரசபை தன்னில்

          குழல்வாய் மொழியினளாய்
                    திதித் திதித் தித்தித்தி என கொம்பதிர
                              குறித்தாடும் குறும்பலா ஈசருடன்
                                                               - ஆடினையே தாயே!

மடமஞ்ஞை மருண்டாட மணியம்பலம் தன்னில்
          உடன்று வண்டார்குழலியாய்
                    டமடட் டமடட் டிகுட் என உடுக்கை ஆர்ப்ப
                              உழன்றடும் ஊர்த்துவதாண்டவருடன்
                                                              - ஆடினையே தாயே!

வைகை வழிந்தோட வெள்ளியம்பலம் தன்னில்
          வையம் புகழ் மீனாட்சியாய்
                    திமிதித் திமி திமிதி என முரசொலிக்க
                              விரைந்தாடும் சுந்தரேசருடன்
                                                                 ஆடினையே தாயே!

தாமிராபரணி தவழ்ந்தோட தாமிரசபை தன்னில்
           தாயாம் காந்திமதியாய்
                     தகுதி திந்திகு திந்ததோ எனுந் தாளஜதிக்கு
                               நெகிழ்ந்தாடும் நெல்லையப்பருடன்
                                                               - ஆடினையே தாயே!
இனிதே, 
தமிழரசி

குறிப்பு:
1996 ம் ஆண்டு ஆடிப்பூரம் அன்று நெல்லையப்பர் கோயில் காந்திமதி அம்மன் சந்நிதியில் எழுதியது.

No comments:

Post a Comment