Thursday, 21 June 2012

ஆசைக்கவிதைகள் - 35


வாரி அணைத்துக் கொஞ்சலாம்

பண்டைய நாள் தொட்டு, இன்றுவரை மனிதன் ஊஞ்சல் கட்டி ஆடுகிறான். குருவிகளைப்போல் மிருகங்களைப்போல் கொடிகளிலும், விழுதுகளிலும் ஆடியமனிதன் இன்று  எத்தனையோ வகை வகையாக ஊஞ்சல் செய்து ஆடுகிறான். ஆனால் இன்றும்  நாட்டுப்புறங்களில் ஆலம் விழுதில் ஊஞ்சல் செய்து ஆடும் வழக்கமும், ஆழம் விழுதில் தொங்கி ஆடும் வழக்கமும் இருக்கிறது. அப்படி ஆழமர விழுதில் ஊஞ்சல் ஆடுவது மிகவும் ஆனந்தமாக இருக்கும். ஈழத்தமிழரும் அந்த ஆனந்தத்தை இரசித்தவர்களே.
ஒரு விடலைப் பையன் ஒருவன் தான் எப்படி ஒரு கன்னிப்பெண்ணுடன் ஊஞ்சல் ஆடினான் என்பதை தன் தோழர்களுக்கு கூறுவதாக அமைந்துள்ள ஒரு நாட்டுப்புற ஊஞ்சல் பாடல் இது.
ஆண்: “ஆலமரத்து விழுதிலே
                     ஊஞ்சல் கட்டி ஆடலாம்
          ஆள ஆள பாத்துமே
                     ஆனந்தமாய் ஆடலாம்”
ஆண்:  “கீழ கண்ணால் பாத்துமே
                      கிறுகிறுக்க செய்யலாம்  
             மேல கீழ போகயில
                       மெதுவா கொஞ்சம் வருடலாம்”
 ஆண்: “சேலமெல்ல நழுவயில
                      திருத்தும் அழகை ரசிக்கலாம்
             வாலகுமரி தன்னையே
                     வாரி அணைத்துக் கொஞ்சலாம்”
                                         -  நாட்டுப்பாடல் (பாலியாறு)
                                         (பண்டிதர் மு ஆறுமுகன் நாட்டுப்பாடல் தேட்டத்திலிருந்து)

No comments:

Post a Comment