வாழும் உலகிற் பறப்போம்

கூவும் குயில் குரலில் கண்கள் மெல்ல விழித்து

கன்னித் தமிழ் பாடல் கவிதை தனைச் சுவைப்போம்

மேவும் கதிர் ஒளியில் மேயும் கன்றைப் பார்த்து

மெல்லப் போய் அணைத்து முத்த மிட்டு மகிழ்வோம்

தாவும் முயல் பின்னால் தயங்கித் தயங்கிச் சென்று

தளிரைக் கொஞ்சங் கொடுத்து தின்னு மழகை ரசிப்போம்

வாவும் வண்ணப் பூச்சி வண்ணந் தனை வரைந்து

  வட்ட மிட்டுத் திரிந்து வாழும் உலகிற் பறப்போம்

இனிதே,

தமிழரசி.

சொல்விளக்கம்:

மேவும் - பரவுதல்

தாவும் - தாவிப் பாயும்

வாவும் - அசைதல்/பறத்தல்/பாய்தல்

குறிப்பு:

பேத்தி மகிழினி பாடியாடித் திரிய எழுதியது.