Monday 24 October 2016

துணைக்கு வரும் காளைகள்


வெள்ளை நிறக் காளை இது
           வைக்கல் உணும் காளை இது
கொள்ளை இன்பம் கொண்ட துமே 
           கொஞ்சி மகிழ் காளை இது

துள்ளி ஓடும் காளை இது
           துணைக்கு வரும் காளை இது
அள்ளி முத்தம் இட்ட துமே
            அன்பாய் முட்டுங் காளை இது

வெள்ளி நிறக் காளை அது
            வயல் உழும் காளை அது
தள்ளி நின்று தொட்ட துமே
            தலை யாட்டுங் காளை அது

தள்ளை போன்ற காளை அது
            தொல்லை தராக் காளை அது
பிள்ளை எனை கண்ட துமே
            பையப் போகுங் காளை அது
                                                     - சிட்டு எழுதும் சீட்டு 127

சொல் விளக்கம்:
1. தள்ளை - தாய்
2. உணும் - உண்ணும்
3. கொள்ளை - மிக்க
4. தொல்லை - துன்பம்
5. பைய - மெதுவாக

குறிப்பு:
மூன்று வயதுப் பேரன் படிக்க 10 - 10 - 2016 அன்று எழுதியது.

2 comments:

  1. இனிய தீபாவளி வாழ்த்துகள்

    ReplyDelete
    Replies
    1. எல்லோருக்கும் மங்கலத் தீபத்திருநாள் வாழ்த்து.

      Delete