பல்லவி
வருக வருகவே வரந்தர விரைந்தே
வளர் நயினைப்பதி உறை நாகேஸ்வரியே
- வருக
அனுபல்லவி
இருகரம் குவித்து இறைஞ்சிடும் எமையாள
திருவிழி மலர்ந்திட திருநகை பொலிய
- வருக
சரணம்
விற்பிடித்த விசயற்கு வேண்டி அருள்செய்ய
புற்றரவம் பூண்ட புயங்கனும் நீயும்
வற்கலையின் உடையோடு வனத்தின் இடையே
பொற்பதம் நோவ போந்த வடிவுடனே
- வருக
திருமகள் மார்பனும் திசைமுக நாதனும்
இருவரும் காண்பரிய எரியழலாய் நின்ற
உருவிலானை உன்பாகத்து உகந்த உமையே
இருநிலம் வாழ்த்திட இணையடி சூட்டிட
- வருக
இனிதே,
தமிழரசி.
வளர் - வளர்ச்சி/மூலசக்தி
நயினைப்பதி - நயினாதீவு
உறை - வாழும்
இறைஞ்சிடும் - தாழ்ந்து வணங்கும்
திருநகை - புன்னகை
பொலிய - துலங்க
விசயன் - அர்ச்சுனன்
வேண்டி - விரும்பி
புற்றரவம் - பாம்பு
பூண்ட - அணிந்த
புயங்கன் - பாம்பை அணியும் சிவன்
வற்கலையின் உடை - மரவுரி/மரநாரால் ஆன உடை
வனதத்தின் இடையே - காட்டின் இடையே
பொற்பதம் - பொன் போன்ற பாதம்
போந்த - போன
திருமகள் மார்பன் - திருமால்
திசைமுக நாதன் - நான்முகன்/ பிரமா
இருவரும் - திருமால், நான்முகன் ஆகிய இருவரும்
காண்பரிய - காணமுடியாதபடி
எரியழலாய் - தீப்பிழம்பு
உருவிலான் - உருவம் அற்றவன் [சிவன்]
உன்பாகம் - உனது பகுதி [வலப்பாகம்]
உகந்த - ஏற்ற
இருநிலம் - நிலம், நீர் இரண்டாலும் ஆன பூமி
இணையடி - இரண்டு திருவடிகளும் சேர்ந்து
