மணிமிடற் றந்தண மயக்கங்கள் போக்கவே
மனதினிற் தங்கியே மாயையை காட்டவே
அணிநிழல் காட்டினை அரங்கது ஆக்கியே
அனைத்துயிர் வாழவே ஐம்பூ தமொடு
பணிவளை குலுங்கிட பறையது ஆர்ப்ப
பலவிசை இயம்ப பல்லுருவம் பெயர்த்து
வேணிமுடித்த சடை விண்திசை அலம்ப
வியந்து நாம்காண விரைந்து நீயாடு
இனிதே,
தமிழரசி.
சொல்விளக்கம்:
மணிமிடறு - நீலமணி போன்ற கழுத்து [நஞ்சுண்டதால்]
அந்தணன் - செந்தன்மை பூண்டொழுகும் சிவன்
மயக்கங்கள் - தடுமாற்றங்கள்
மாயை காட்டல் - பொய்யா? மெய்யா? எனும் உண்மையைக் காட்ட
அணிநிழல் காடு - மரநிழலால் செறிந்த காடு
அரங்கம் - மேடை
அனைத்துயிர் - எல்லா உயிரும்
ஐம்பூதம் - நிலம், தீ, நீர், காற்று, வான்வெளி
பணிவளை - பாம்பாலான காப்பு
பலவிசை இயம்ப - பலவகை இசைகளின் ஒலி எழ
பல்லுருவம் பெயர்த்து - பல உருவங்களை மாறி மாறி எடுத்து
வேணிமுடித்த சடை - முடித்த கூந்தல் சடை
விண்திசை அலம்ப -வானத்துத் திசையெங்கும் அலைய
வியந்து - வியப்போடு
