துணைக்கு வரும் காளைகள்

வெள்ளை நிறக் காளை இது

           வைக்கல் உணும் காளை இது

கொள்ளை இன்பம் கொண்ட துமே 

           கொஞ்சி மகிழ் காளை இது

துள்ளி ஓடும் காளை இது

           துணைக்கு வரும் காளை இது

அள்ளி முத்தம் இட்ட துமே

            அன்பாய் முட்டுங் காளை இது

வெள்ளி நிறக் காளை அது

            வயல் உழும் காளை அது

தள்ளி நின்று தொட்ட துமே

            தலை யாட்டுங் காளை அது

தள்ளை போன்ற காளை அது

            தொல்லை தராக் காளை அது

பிள்ளை எனை கண்ட துமே

            பையப் போகுங் காளை அது

                                                     - சிட்டு எழுதும் சீட்டு 127

சொல் விளக்கம்:

1. தள்ளை - தாய்
2. உணும் - உண்ணும்
3. கொள்ளை - மிக்க
4. தொல்லை - துன்பம்
5. பைய - மெதுவாக

குறிப்பு:

மூன்று வயதுப் பேரன் படிக்க 10 - 10 - 2016 அன்று எழுதியது.