பைந்தமிழ் பழரசம்

அழகிய பழமுதிர் அருஞ்சோலையங் காட்டில்

  அருவிநீர் ஆடி ஆனந்த மயிலென

இழகிய மனமும் இளமையின் வேகமும்

  இசைந்திட வந்தே இணையடி தொழுதேன்

பழகிய தமிழ்ச்சொல் பயின்றிடும் வேளையில்

  பைந்தமிழ் பழரசம் பரிவுடன் தந்தாய்

குழகனே குமரனே கூவியே அழைத்தேன்

  குன்றுதோ ராடிடும் குரைகழல் காட்டு

இனிதே,

தமிழரசி.

சொல்விளக்கம்:

அருஞ்சோலை - எல்லாவளமும் நிறைந்த அரிய சோலை

இசைந்திட - ஒன்றாய்ச் சேர்ந்திட

இணையடி - திருவடி இரண்டையும் ஒன்றாய்

பயின்றிடும் - கற்றிடும்

வேளையில் - நேரத்தில்

பைந்தமிழ் பழரசம் - பைந்தமிழ்ச் சாறு

பரிவுடன் - இரக்கத்துடன்

குழகனே - முருகனே

குமரனே - இளமையானவனே

கூவியே - நெடுந்தூரம் கேட்க சத்தமிடல்

குன்றுதோராடிடும் - மலைகளில் ஆடும்

குரைகழல் - மணிகள் ஒலிக்கும் திருவடி